ܐܕܝܘܡ 7 ܒܐܕܼܪ 2010 ܒܬܦܩܐ ܝܠܗ ܝܘܡܐ ܐ݇ܚܪܝܐ ܕܓܘܒܝܐ ܕܦܪܠܡܢ ܕܥܝܪܩ، ܘܓܘ ܕܐܗܐ ܓܘܒܝܐ ܒܕ ܡܚܙܐ ܥܡܐ ܥܝܪܩܝܐ ܒܟܘܠܝܗܝ ܐܡܘܬ̈ܗ ܐܚ̈ܐ ܟܡܐ ܝܠܝܗܝ ܫܩܝܠܗ ܠܡܫܬܐܠܢܘܬܝܗܝ ܡܛܘܠ ܝܗܒ݂ܠܬܐ ܕܩܠ̈ܐ ܩܐ ܐܢܝ ܠܘܚ̈ܐ ܐܘ ܩܝܡܝܬ̈ܐ ܕܒܫ ܒܗܦܟ݂ܐ ܝܠܝܗܝ ܠܣܘܟܝܝܗܝ ܘܒܥܘܝܬܝ̈ܗܝ ܓܘ ܥܝܪܩ ܚܕܬܐ.

ܬܫܥܝܬܐ ܕܥܝܪܩ ܪܚܩܐ ܘܩܘܪܒܐ ܡܚܙܘܝܐ ܠܗ̇ ܩܬܢ ܕܠܐ ܚܕ݇ ܛܟ݂ܣܐ ܕܝܡܘܩܪܛܝܐ ܥܠܡܝܐ ܠܐ ܝܠܗ̇ ܡܬܗܘܝܢܬܐ ܐܘ ܡܬܡܨܝܢܬܐ ܕܐܬܪܐ ܕܥܝܪܩ ܗܘܐ ܓܘ ܫܝܢܐ ܘܫܠܡܐ، ܘܐܚܟ̰ܝ ܓܘ ܕܐܗܐ ܛܟ݂ܣܐ ܕܝܡܘܩܪܛܝܐ ܥܠܡܝܐ ܕܢܛܪ ܙܕܩ̈ܐ ܕܟܠ ܩܘܒܘܚܬܐ، ܐܘܡܬܐ ܐܘ ܬܘܕܝܬܐ.

ܚܡܝܬܐ ܠܛܟ݂ܣܐ ܕܝܡܘܩܪܛܝܐ ܟܠܝܬܐ ܝܠܗ̇ ܓܘܢܐܝܬ ܥܠ ܟܢܫܐ ܕܐܬܪܐ ܕܥܝܪܩ ܒܟܘܠܠܝܗܝ ܐܡܘܬ̈ܗ ܡܛܠ ܐܢ ܟܘܠ ܐܘܡܬܐ ܡܨܐ ܠܗ ܟܠ ܦܪܨܘܦܐ ܐܘ ܗܕܡܐ ܡ̣ܢ ܗܕܡ̈ܐ ܕܐܗܐ ܟܢܘܫܝܐ ܐܘ ܐܘܡܬܐ ܠܡܫܘܬܘܦ̈ܐ ܓܘ ܕܐܗܐ ܓܘܒܝܐ ܗ̇ـܝ ܥܕܢܐ ܡܚܙܘܝܐ ܝܠܗ̇ ܗ̇ـܝ ܐܘܡܬܐ ܐܘ ܟܢܘܫܬܐ ܠܕܘܪܗ̇ ܥܒ݂ܘܕܐ ܓܘ ܫܘܘܫܛܐ ܘܡܬܛܘܪܢܘܬܐ ܕܐܬܪܐ ܠܐܘܪܚܐ ܕܡܐܙܠܬܐ ܕܝܡܘܩܪܛܝܬܐ ܡܛܘܠ ܚܘܡܣܢܐ ܘܫܝܢܐ ܘܫܠܡܐ ܕܐܬܪܐ ܕܡܨܐ ܟܘܠ ܚܕ ܡ̣ܢ ܗܕܡܐ ܕܐܗܐ ܟܢܘܫܝܐ ܗܘܐ ܢܝܚܐ ܘܦܨܝܚܐ ܓܘ ܚܝܘܬܗ ܘܕܥܬܝܕܗ ܓܘ ܐܬܪܐ ܕܥܝܪܩ.

ܐܢ ܓܫܩܚ ܥܠ ܫܘܝܐ ܕܐܘܡܬܢ ܕܦܝܫܬܐ ܝܠܗ̇ ܛܠܝܡܬܐ ܓܘ ܟܘܠ ܠܗ̇ ܡܐܙܠܬܐ ܕܚܝܘܬܗ̇ ܓܘ ܕܐܗܐ ܐܬܪܐ ܐܠܨܝܬܐ ܝܠܗ̇ ܒܫ ܝܬܝܪ ܠܡܫܘܬܘܦ̈ܐ ܓܘ ܓܘܒܝܐ ܕܐܕܝܘܡ ܡܛܘܠ ܕܡܨܚ ܚܬ݂ܬ݂ܚ ܠܦܪܠܡܢ ܕܥܝܪܩ ܕܥܡܢ ܠܐ ܩܒܠ ܒܕܥܬܝܕ ܐܚܟ̰ܝ ܒܚܡܫܐ ܩܝܘܡ̈ܐ ܕܦܝܫܐ ܝܠܝܗܝ ܡܘܚܫܚ̈ܐ ܐܝܟܼ ܟܘܬܐ ܩܐ ܒܢ̈ܝ ܐܘܡܬܢ ܟܠܕܝܬܐ ܣܘܪܝܝܬܐ ܐܬܘܪܝܬܐ.

ܐܢ ܒܢ̈ܝ ܐܘܡܬܢ ܒܘܫܝܘܬܝܗܝ ܡܫܘܬܦ ܠܗܘܢ ܓܘ ܕܐܗܐ ܓܘܒܝܐ، ܩܢܝܬ̈ܐ ܒܗܘܝ ܪܒܐ ܣܓܝܐ̈ܐ ܘܡܘܬܪ̈ܐ ܩܐ ܐܘܡܬܢ ܘܩܘܝܡܢ ܒܕܥܬܝܕ ܡܛܘܠ ܦܘܪܩܢܢ ܘܡܟܠܝܬܐ ܕܡܫܚܛܘܬܢ ܡ̣ܢ ܐܬܪܢ ܘܦܫܪܬܢ ܓܘ ܐܬܪ̈ܘܬܐ ܕܓܠܘܬܐ.

ܟܘܠ ܚܕ ܡ̣ܢ ܒܢ̈ܝ ܐܘܡܬܢ ܝܕܥܐ ܐܕܝܘܡ ܕܐܚܢܢ ܐܝܬ ܠܢ ܐܚܟ̰ܝ ܚܡܫܐ ܩܝܘܡ̈ܐ ܓܘ ܦܪܠܡܢ ܕܥܝܪܩ ܗܠܒܬܐ ܕܠܐ ܩܝܘܡ̈ܐ ܕܒܐܣܩܐ ܝܠܝܗܝ ܒܐܘܪܚܐ ܕܓܒ̈ܐ ܕܠܐ ܝܠܝܗܝ ܓܒ̈ܐ ܕܒܢ̈ܝ ܐܘܡܬܢ، ܐܝܢܐ ܡܕܪܐ ܐܠܨܝܬܐ ܝܠܗ̇ ܕܟܘܠ ܠܝܗܝ ܐܢܝ ܩܝܘܡ̈ܐ ܗܘܐ ܠܗܘܢ ܚܕܐ ܚܝܪܬܐ ܓܘܪܬܐ ܘܪܘܝܚܬܐ ܠܣܢܝܩܘܬ̈ܐ ܕܟܢܫܢ ܘܙܕܩ̈ܗ ܐܘܡܬܢܝ̈ܐ ܘܦܘܠܝܛܝܩܝ̈ܐ ܓܘ ܐܬܪܐ ܕܥܝܪܩ ܚܕܬܐ.

ܐܠܨܝܬܐ ܝܠܗ̇ ܕܩܝܘܡ̈ܐ ܕܥܡܢ ܓܘ ܦܪܠܡܢ ܕܥܝܪܩ ܕܦܠܚܝ ܠܫܪܪܬܐ ܠܒܥܘܝܬ̈ܐ ܕܐܘܡܬܢ ܘܙܕܩ̈ܗ̇ ܢܡܘܣܝ̈ܐ ܐܝܟܼ ܥܡܐ ܫܪܫܝܐ ܓܘ ܐܬܪܐ ܕܥܝܪܩ ܚܕܬܐ ܘܐܢܝ ܝܠܝܗܝ:

1. ܫܪܪܬܐ ܕܫܘܠܛܢܐ ܝܬܝܐ ܥܠ ܐܪܥܗ ܬܫܥܝܬܢܝܬܐ ܓܘ ܥܝܪܩ ܒܝܕ ܣܝܡܬܐ ܕܩܢܘܢ̈ܐ ܘܐܣ̈ܐ ܕܫܘܠܛܢܐ ܝܬܝܐ ܓܘ ܩܠܝܡܐ ܕܟܘܪܕܣܬܢ ܘܫܪܪܬܐ ܕܐܗܐ ܫܘܠܛܢܐ ܝܬܝܐ ܓܘ ܢܡܘܣܐ ܕܥܝܪܩ ܦ̮ܕܪܠܝܐ.

2.  ܫܪܪܬܐ ܕܫܘܡܗܢ ܐܘܡܬܢܝܐ ܗܘ ܕܐܝܬ ܠܗ ܘܪ̈ܝܕܐ ܥܡܝܩ̈ܐ ܓܘ ܡܬܛܘܪܢܘܬܐ ܕܟܢܫܢ ܓܘ ܒܝܬܢܗܪ̈ܝܢ.

3.  ܦܠܚܬܐ ܠܡܕܥܪܬܐ ܕܐܪܥܬ̈ܢ ܘܡܬܘܬ̈ܢ ܘܚܡܝܬܐ ܠܕܝܡܘܓܼܪܦ̮ܝܐ ܕܦܢܝܬ̈ܐ ܕܒܚܝܐ ܝܠܗ ܓܘܝܗܝ ܥܡܢ.

4.  ܦܠܚܬܐ ܡܛܘܠ ܦܬܚܬܐ ܕܬܪ̈ܡܝܬܐ ܕܦܠܚܢܢ̈ܐ ܘܫܘܓ݇ܠܢ̈ܐ ܓܘ ܦܢܝܬ̈ܐ ܕܒܚܝܐ ܝܠܗ ܓܘܗ ܥܡܢ.

5.  ܥܕܪܢܬܐ ܕܒܢ̈ܝ ܐܘܡܬܢ ܡܘܫܚܛ̈ܐ ܓܘܝܐ ܐܘ ܒܪܝܐ ܕܥܝܪܩ ܠܕܥܪܬܗ ܠܦܢܝܬ̈ܐ ܫܪ̈ܫܝܐ ܕܒܚܝܐ ܝܗܘܘ ܓܘ ܩܠܝܡܐ ܕܟܘܪܕܣܬܢ ܘܡܛܝܒܢܘܬܐ ܕܟܘܠ ܠܝܗܝ ܬܢܘ̈ܐ ܐܘ ܫܪ̈ܛܐ ܕܚܝܘܬܐ ܩܬܝܗܝ.

6.  ܦܬܚܬܐ ܕܒܝܬܨܘܒ̈ܐ ܒܠܫܢܢ ܓܘ ܦܢܝܬ̈ܐ ܕܒܚܝܐ ܝܠܗ ܓܘܗ ܥܡܢ.

ܘܒܚܘܬܡܐ ܐܝܬ ܠܢ ܣܒ݂ܪܐ ܕܓܒ̈ܐ ܕܡܨܝ ܡܣܩܝ ܩܝܘܡ̈ܐ ܓܘ ܦܪܠܡܢ ܕܥܝܪܩ ܕܦܠܚܝ ܠܫܪܘܪܐ ܠܟܘܠ ܠܝܗܝ ܢܘܩܙ̈ܐ ܕܡܘܨܠܝ̈ܐ ܝܗܘܘ ܓܘ ܚܘܪܙܐ ܕܓܘܒܝܐ ܘܡܚܙܝ ܩܐ ܥܡܢ ܣܘܥܪܢܐܝܬ ܕܐܢܝ ܝܠܝܗܝ ܩܝܘܡ̈ܐ ܫܪܝܪ̈ܐ ܘܡܗܘܡܢ̈ܐ ܠܢܝܫ̈ܐ ܥܠܝ̈ܐ ܕܐܘܡܬܢ ܘܣܢܝܩܘܬ̈ܗ̇.